Чараларны ачуда Татарстан Рәисе Рөстәм Миңнеханов, Россия Үзәксоюз советы рәисе Дмитрий Зубов, Россия авыл хуҗалыгы министры урынбасары Андрей Разин, Татарстанның авыл хуҗалыгы һәм азык-төлек министры Марат Җәббаров катнашты.

Иң элек Татарстан кооператорларына 39 махсус машина тапшырдылар.

– Бүген – зур тантана. Бу форумда Россия вәкилләрен генә түгел, ә халыкара Татпотребкооперацияне кабул итү дә зур дәрәҗә. Авыл кешеләренә Татпотребсоюзның хезмәте бик кирәк. Шушы машиналар ярдәмендә халык белән эшләүнең сыйфатын яхшыртабыз, дип ышанам. Котлыйм сезне! – диде Рөстәм Миңнеханов.

Дмитрий Зубов бәйрәм белән котлады һәм Татарстанга кунакчыллыгы өчен рәхмәт әйтте.

– Бүген – Россия һәм Татарстан кооператорларының икеләтә бәйрәме. Кулланучылар кооперациясенә – 195, Татарстан кооперациясенә 110 ел. Аны шундый зур чаралар белән билгеләп узабыз. Рөстәм Нургалиевичка һәм аның командасына кунакчыллык өчен зур рәхмәт. 200 еллыкны каршы алганда, татарча да сөйләшә башлармын әле, – диде Дмитрий Зубов.